Skuadra e Kukësit ka fituar me shifrat minimale 1-0 duelin ndaj Dinamos në sfidën e cila u zhvilluar në “Air Albania”. Goli i vetëm i takimit u shënuar nga Edi Basha në minutën e 28 të takimit. Pas një topi të gjatë nga mbrojtja, kroati mposht portierin me një parabol mjaft të bukur duke çuar në delir verilindorët. Avantazhi i dha komoditetin e duhur skuadrës së trajnerit Diego Longo që administroi rezultatin deri në fundin e lojës. Kukësi kishte pretendime për një penallti në pjesën e parë ndërsa në fushë nuk munguan as tensionet. Enea Jorgji ndëshkon me karton të verdhë Rimal Haxhiun dhe Gjelbrim Taipin pas një përplasje të këtyre dyve në mesfushë.
Në pjesën e dytë nuk pati shumë histori. Skuadra e Dinamos tentoi herë pas herë të vendoste në vështirësi verilindorët por Tafas ishte në ditën e tij më të mirë. Në fund skuadra e Kukësit grumbulloi tre pikë të tjera dhe ngjitet në majën e klasifikimit me pikë të barabarta me Tiranën që luan të shtunën me Vllazninë por ka golavarazh më të mirë se bardheblutë. Nga ana tjetër Dinamo tregoi sërish se është një skuadër me oshilacione dhe ka shumë pak shanse për titull, objektiv që është vendosur nga drejtuesit e klubit.
