Pas incidentit me selinë e PD në Fier, ku u ndërrua brava e çelësave, një ngjarje e ngjashme ka ndodhur dhe në selinë e PD Shkodër. Mësohet se selisë së demokratëve në Shkodër i është vënë dryni, teksa kangjellat e portës hyrëse në të janë të mbyllura.
Kjo gjë është denoncuar nga anëtari i kryesisë së Partisë Demokratike, Ervin Gjini, i cili i ka bërë thirrje kryetarit të degës së PD-së në Shkodër, Xhevdet Amuli të “distancohet nga kjo lajthitje” pasi dega nuk është pronë private.
“Dëshpërimi që ka kapluar pseudotolerantat dhe gjithëpërfshirësit Bashistë shprehet mirë në aksionin e mbylljes me zinxhirë të degës së PD-së Shkodër. I bëj thirrje kryetarit të degës z. Xhevdet Amuli të distancohet nga kjo lajthitje pasi dega nuk është pronë private”, shkruan ai.
Incidente janë shënuar edhe në selinë blu në kryeqytet ku disa mbështetëse të ish-kryeministrit Sali Berisha janë përplasur me simpatizantë të kreut të PD, Lulzim Basha.
Discussion about this post