Andrea Pirlo nuk do të jetë trajneri i ri i Italisë. Kështu është vendosur nga Federata italiane që i ka dhënë fund edhe kësaj piste, ndaj dhe 47-vjeçari mund të quhet praktikisht jashtë planeve për t’u ulur në stolin e kombëtares, pavarësisht akordit në parim për hedhjen e firmës.
Siç raporton gazetari Matte Moretto, shkak i kësaj zgjedhje të vështirë janë bërë kritikat që mbërritën në adresë të federatës, pra për arsyet politike, pasi Pirlo rezultoi të ishte nën kontratë me një kompani bastesh në Rusi dhe lidhje me Putinin.
Ndaj dhe tek Italia, vendosën që me Pirlon mos të vazhdojnë më tej dhe të ndjekin të tjera alternativa si Roberto Mancini dhe Antonio Conte, të cilët mbeten pjesë e planit për t’i kontaktuar.
Më herët, Italisë i thanë “JO” Pep Guardiola si dhe Carlo Ancelotti, ky i fundit nën kontratë me Brazilin.
Së fundmi, vetë Pirlo ka zgjedhur që ta thyejë heshtjen dhe këtë e ka bërë përmes një postimi në rrjetin e tij social në Instagram, ku sqaron gjithë të vërtetën e kësaj historie, ndërsa shprehet se sido që të përfundojë, do t’i mbetet falenderues Maldinit dhe Leonardos që besuan tek ai.
POSTIMI:
“Gjatë ditëve të fundit, kam qenë dëshmitar me hidhërimin më të madh lidhur me një debat të zhvilluar rreth emrit tim dhe mundësisë që të shërbej si trajner i kombëtares italiane. Me gjithë respektin për institucionin, Federatën dhe të gjithë ata që janë përfshirë, kam zgjedhur që të mbaj qetësinë. Megjithatë, e ndjej si detyrë që t’i qartësoj disa gjëra.
Përgjatë karrierës sime, fillimisht si lojtar dhe më pas si trajner, i kam kryer të gjitha aktivitetet në përputhje me të gjitha ligjet e vendeve në të cilat kam punuar dhe kontratat që kam nënshkruar. Bashkëpunimi profesional i cili është vënë në qendër të polemikave të fundit, ka lindur në kontekstin e karrierës sime në Emiratet e Bashkuara Arabe dhe është ekskluzivisht i natyrës tregtare dhe sportive. Ndaj dhe t’i atribuosh rëndësi politike këtij bashkëpunimi do të nënkuptonte të më atribuosh bindje që nuk i kam shprehur kurrë dhe që nuk janë të miat.
Duhet të falenderoj Maldinin dhe Leonardon për nderimin dhe besimin që kanë shfaqur tek unë. Jam i vetëdijshëm për ekspertizën, profesionalizmin dhe dashurinë që ata i kanë dedikuar gjithmonë futbollit italian. Ndjej keqardhje që një vendim sportiv u zvarrit shpejt në një debat publik që përfundoi duke më atribuar mua kuptime dhe mendime që s’janë të miat. Dashuria ime për Italinë nuk varet nga asnjë pozicion. Është pjesë e historisë, identitetit tim, dhe do të mbetet gjithmonë me mua.”
Discussion about this post