Pushimet për 23 turistë grekë drejt Italisë, janë anuluar pasi ata kanë rezultuar pozitivë me COVID-19.
Mediat greke shkruajnë se autobusi me turistët grekë ishte nisur në orën 17:00 të pasdites nga sheshi “Piazzale Giustiniani” për në Veneto, kur pasagjerët ishin shqetësuar për simptomat e dy prej tyre. Stafi mjekësor (dy infermierë, dy mjekë dhe dy administratorë) u njoftuan në vendngjarje, ndërsa turistëve iu kërkua të qëndronin në autobus.
6 prej tyre u dërguan në spitalin në Noale dhe 2 në spitalin pulmonologjik në Dolo. Më pas pesë prej turistëve rezultuan gjithashtu pozitivë duke e çuar numrin total të rasteve në 23 persona. Brenda katër orësh organi kompetent shëndetësor i Venecias Ulss 3 ka mundur të identifikojë dhe izolojë rastet, ndërsa mjekët po monitorojnë gjendjen e turistëve të cilët kanë shfaqur simptoma. Sipas informacioneve, atyre që do të mund të marrin trajtimin përkatës do t’u jepen antitrupa monoklonale, siç ndodh së fundmi në rajonin e Venetos.
“Ishte një përpjekje e madhe. Ne kemi ndërmarrë veprime në shumë fronte në të njëjtën kohë: gjurmim, vlerësim epidemiologjik, diagnostikim, izolim dhe verifikim të mutacioneve të koronavirusit,” tha Edgardo Contato, menaxher i përgjithshëm i kompanisë së kujdesit shëndetësor.
