Radhë kilometrike në Qafë Botë, qindra automjete në pritje për të kaluar kufirin me Greqinë

Radhët e gjata të automjeteve vijojnë edhe këtë të hënë në pikën e kalimit kufitar të Qafë Botës, ku qindra qytetarë po presin për të kaluar kufirin.

Sipas të dhënave nga terreni, vonesat krijohen kryesisht në palën greke, ku aktualisht funksionojnë dy sportele. Në anën shqiptare, për përpunimin e udhëtarëve dhe automjeteve janë në punë 4-5 sportele.

Në zonën e pushimit pranë pikës kufitare shqiptare ndodhen në pritje rreth 500 automjete. Edhe në territorin grek është krijuar një kolonë e gjatë mjetesh, e cila shtrihet deri pranë pikës shqiptare të kalimit kufitar.

Nga ora 05:00 e mëngjesit të së hënës, kur ka nisur puna në Qafë Botë, deri në këto momente llogaritet se rreth 3 mijë persona kanë hyrë ose dalë përmes kësaj pike kufitare.