Njëmbëdhjetë organizata dhe shoqata shqiptare me seli në Mbretërinë e Bashkuar i kanë drejtuar një letër të hapur Qeverisë dhe Kuvendit të Shqipërisë, ku shprehin mbështetje për protestat qytetare dhe kërkojnë ndalimin e çdo forme dhune ndaj protestuesve paqësorë.
Nismës i është bashkuar edhe shkrimtarja shqiptare Lea Ypi, e cila ka publikuar letrën në rrjetet sociale.
Në reagimin e tyre, organizatat vlerësojnë protestat si një shprehje të demokracisë dhe të së drejtës kushtetuese të qytetarëve për të kërkuar llogari nga institucionet.
Sipas tyre, në protesta marrin pjesë të rinj, prindër, profesionistë dhe studiues, të cilët synojnë të mbrojnë pasuritë natyrore, hapësirat publike dhe të drejtën për t’u dëgjuar nga autoritetet shtetërore.
Në letrën e hapur, organizatat dënojnë çdo akt dhune, frikësimi apo represioni ndaj protestuesve paqësorë dhe i bëjnë thirrje qeverisë të nisë një dialog të sinqertë me shoqërinë civile.
Dokumenti përmban katër kërkesa kryesore: transparencë të plotë për ligjet dhe kontratat që lidhen me mjedisin dhe pasuritë natyrore; llogaridhënie për shitjen ose koncesionimin e pasurive shtetërore; mbrojtjen e interesit publik në politikat e zhvillimit ekonomik; si dhe hapjen e një dialogu konstruktiv me përfaqësuesit e protestuesve.
Letra është firmosur nga UKAP Foundation, Kosovar Albanian Youth Against Violence, British Albanian Culture & Arts Association, Edinburgh University Albanian Society, Albanian Book Lovers Culture Club, Cambridge Uni Albanian Society, LSE Albanian Society, Diasporas Speaking, UCL Albanian Society, Successful Mothers dhe Gjurmë Iliriane.
Discussion about this post