Kryeministri Edi Rama ka kercenuar me perjashtim në mbledhjen me dyer të mbyllura të grupit parlamentar socialist, ish-ministren e Jashtme, Elisa Spiropali. Kjo vjen pas qëndrimeve publike që ajo ka mbajtur pas largimit nga kabineti.
Burimet bëjnë të ditur se kreu i ekzekutivit i ka kujtuar Spiropalit faktin që një herë nuk ka marrë pjesë në votim në Parlament në rrëzimin e kërkesës së SPAK për dhënien e autorizimit të arrestimit të Belinda Ballukut, ndërsa herën e dytë ka bërë një shkrim të gjatë në Facebook, ku ka kritikuar maxhorancën.
“Herën e parë nuk votove, herën e dytë bëre çarçaf, herën e 3-të del nga Grupi”, mësohet të ketë thënë Rama në mbledhjen e grupit.
Kryeministri, sipas të njëjtave burime, ka theksuar gjithashtu se në parti “nuk mund të krijohen drama”, duke iu drejtuar drejtpërdrejt Spiropalit:
“Tek puna e partisë nuk mund të bëni drama, dhe për këtë po të drejtohem ty Elisa. Nuk dua të krijoni situata në parti. Partia ka dy ngjyra, bardhë e zi. ose bardhë dhe me ne, ose zi dhe përballë nesh.”
Më tej, Rama ka shtuar se kjo ishte përgjigje për postimet e saj në rrjetet sociale. Në fund të mbledhjes, sipas burimeve, Elisa Spiropali ka kërkuar të marrë fjalën, por nuk është lejuar.
“Ti s’mund të replikosh këtu, ti nuk merr fjalë më, me ty është investuar PS dhe unë”, mësohet të ketë thënë kryeministri në përfundim të diskutimit.
Në përgjigje të kritikëve të Ramës, Spiropali mësohet të ketë thënë “Nuk është trimëri të përjashtosh, trimëri është të dëgjosh. Më përjashton ti, jo ajo”.
Kreu i qeverisë në fund ka paralajmëruar të zgjedhë ose të jetë me PS-në, ose kundër saj.
gijotina.com/
Discussion about this post