Italia po përballet me një ndryshim të fortë të kushteve atmosferike. Reshjet intensive dhe stuhitë kanë detyruar autoritetet të shpallin alarm të kuq në rajonin e Venecias për shkak të rrezikut të përmbytjeve, ndërsa në Emilia-Romagna është kërkuar vigjilencë e lartë.
Sipas Mbrojtjes Civile, Emilia-Romagna ndodhet gjithashtu nën alarm portokalli, ndërsa alarmi i verdhë është në fuqi në të gjitha rajonet e Italisë Qendrore dhe Jugore, përfshirë edhe ishujt.
Ndërkohë, temperaturat e larta po humbasin intensitet. Vetëm Catania dhe Reggio Calabria mbeten nën alarm të kuq për vapën ekstreme, ndërsa Messina është në nivel portokalli. Qytetet e tjera janë klasifikuar me alarm të verdhë.
Parashikimet për të premten, 3 korrik, tregojnë përmirësim të situatës. Vetëm nëntë qytete pritet të mbeten nën masa alarmi për temperaturat e larta, ndërsa pjesa më e madhe e vendit do të kalojë në nivelin e gjelbër.
Stuhitë që përfshinë mbrëmjen e kaluar Italinë veriore sollën reshje të dendura, breshër, erëra të forta dhe përmbytje, duke shkaktuar dëme materiale dhe probleme në qarkullim.
Në Milano, erërat rrëzuan pemë dhe degë, bllokuan linja tramvaji dhe përmbytën bodrume. Zjarrfikësit kryen rreth 240 ndërhyrje, ndërsa parqet publike u mbyllën për arsye sigurie.
Edhe Torino u godit nga breshëri dhe erërat e forta, të cilat shkaktuan rrëzim pemësh dhe dëme në disa zona. Brenda pak orësh temperaturat ranë me më shumë se 10 gradë.
Në Venecia, kushtet e vështira atmosferike dhe dukshmëria e kufizuar pezulluan përkohësisht fluturimet në Aeroportin “Marco Polo”. Stuhitë shkaktuan gjithashtu ndërprerje të përkohshme të energjisë elektrike në terminal.
Probleme u regjistruan edhe në Emilia-Romagna, ku përmbytjet, pemët e rrëzuara dhe dëmtimet në çati prekën disa qytete. Në Genova, erërat shembën një skelë ndërtimi, pa shkaktuar të lënduar.
Në provincën e Perugias, zjarrfikësit ndërhynë në dhjetëra raste për pasojat e erës së fortë, ndërsa nuk u raportuan viktima apo persona të plagosur.
Një rrëshqitje dheu bllokoi rrugën provinciale drejt Branzit në zonën e Valle Brembana. Në Altopiano di Asiago, një vorbull ere shkuli çatinë e një hambari dhe hodhi llamarina në rrugë.
Stuhitë prekën edhe rajonet Trentino-Alto Adige dhe Bolzano, ku u regjistruan përmbytje, pemë të rrëzuara dhe një rënie e ndjeshme e temperaturave, e cila solli edhe reshje të lehta dëbore në kalimin malor të Stelvios.
Discussion about this post