Maroku ka siguruar një vend në çerekfinalet e Kupës së Botës, pasi mposhti bindshëm Kanadanë me rezultatin 3-0, duke eliminuar një nga vendet organizatore të turneut.
Pjesa e parë ishte më e mirë për kanadezët, të cilët krijuan disa raste premtuese, por nuk arritën të mposhtnin portierin Bono.
Në minutën e 22-të, Maroku mori një goditje të rëndë me dëmtimin e sulmuesit Ismael Saibari, i cili u detyrua të largohej nga fusha. Megjithatë, 45 minutat e para u mbyllën pa gola.
Në fraksionin e dytë, marokenët ndryshuan ritmin e lojës dhe në minutën e 50-të kaluan në avantazh. Pas një asistimi fantastik të kapitenit Achraf Hakimi, Azzedine Ounahi realizoi me një goditje të saktë, duke zhbllokuar rezultatin.
Në fundin e ndeshjes, Ounahi realizoi edhe golin e dytë personal pas një asistimi të Brahim Diaz, duke u shndërruar në heroin e mbrëmjes.
Në minutën e 98-të, Soufiane Rahimi vulosi fitoren me golin e tretë, ndërsa më herët kishte goditur edhe traversën, duke qenë shumë pranë një tjetër realizimi.
Me suksesin 3-0, Maroku avancon mes tetë skuadrave më të mira të Botërorit dhe në çerekfinale do të përballet me fituesin e sfidës mes Paraguait dhe Francës.
Discussion about this post