Bashkia e Romës ka vendosur që nga sot, ora 9:00 e mëngjesit të jetë e detyrueshme pagesa e një bilete prej dy eurosh për vizitorët që duan të afrohen pranë Shatërvanit të Trevit, një nga monumentet më të njohura të kryeqytetit italian. Bileta do të aplikohet për turistët vendas dhe të huaj në zonën kryesore përballë shatërvanit, ku zakonisht bëhen fotografi dhe hidhen monedha për fat.
Pagesa nuk do të vlejë për qytetarët e lindur në Romë, fëmijët deri në gjashtë vjeç, personat me aftësi të kufizuara dhe guidat turistike. Turistët mund ta paguajnë biletën direkt në vend me kartë, në dyqanet e autorizuara ose përmes rezervimit online. Bashkia ka bërë të ditur se kjo masë synon të menaxhojë fluksin e madh të vizitorëve, i cili aktualisht arrin mesatarisht 30 mijë persona në ditë.
Kryebashkiaku i Romës, Roberto Gualtieri, theksoi se fondet e mbledhura, rreth 8.5 milionë euro në vit, do të përdoren ekskluzivisht për ruajtjen dhe promovimin e trashëgimisë kulturore të qytetit. Hyrja pranë Shatërvanit do të jetë falas pas orës 22:00, duke garantuar akses të lirë për të gjithë vizitorët, ndërkohë që bashkia synon të ruajë monumentin dhe të kufizojë turizmin e tepruar.
Discussion about this post