Përplasjet në distancë mes dy partive opozitare më të mëdha në vend, PD dhe LSI, kanë vijuar dhe ditën e sotme. Viktor Tushaj, ish-deputeti i Lëvizjes Socialiste për Integrim, nuk i ka kursyer akuzat ndaj liderit të PD, Lulzim Basha pas përplasjes së këtij të fundit me përfaqësuesit e LSI-së.
Tushaj e konsideron Bashën si aksidentin më të rëndë që i ka ndodhur PD, dhe e sheh si të paaftë për t’u përballur me mazhorancën.
“Në fakt është humbje kohe të merresh me Lulin por ja vlen t’ia kujtosh ca gjëra, ca bëma, ca flirte, ca gënjeshtra, ca gabime e ca faje, mosmirënjohjen dhe akoma më shumë pabesinë. Në fakt Lul Basha është aksidenti më i rëndë që i ka ndodhur PD-së dhe Shqipërisë në këto vite demokracie. Pesha e tij e përgjegjësisë është jashtëzakonisht e madhe pasi duke qenë i paaftë për t’u përballur me mazhorancën kriminale e duke u shitur tek ata për interesa të pastra financiare, shkatërroi opozitën dhe bashkë me të dhe interesat e shqiptarëve”, shkruan Tushaj.
Sipas tij, askush nuk beson më te Basha, ndërsa e akuzon se për faj të tij, njerëzit kanë humbur dhe shpresën.
“Askush nuk beson më te Luli i Gazit që po bëhet qesharak çdo ditë e më tepër, pasi me vulën e Gazit do përjashtojë partinë nga partia. Ata që e nxitën t’i hynte detit me këmbë, mesa duket nuk i kishin thënë sa i thellë është. Shashkat, deklaratat gënjeshtra dhe të papërgjegjshme apo hijeshia e llakosur nuk e nxjerrin nga llumi i pabesisë dhe nuk e shpëtojnë nga revolucioni i njerëzve të thjeshtë të këtij vendi që, për faj të tij, kanë humbur çdo gjë e bashkë me to dhe shpresën”, deklaron ai.
Tashmë nuk ka asnjë rezervë se mes dy partive më të mëdha të opozitës PD dhe LSI ka një luftë të hapur. E gjitha nisi pas një deklarate nga sekretari i Përgjithshëm i PD-së, Gazmend Bardhi, i cili tha se para zgjedhjeve të 25 prillit i ishin ofruar LSI-së 15 deputetë të sigurt në një listë të përbashkët, por ajo refuzoi sepse parashikonte të fitonte e vetme 34. Kjo deklaratë pasoi me reagime dhe akuza të forta nga LSI.
Discussion about this post