Drejtoria e Përgjithshme e Çerdheve dhe Kopshteve, institucion në varësi të bashkisë Tiranë i ka dhënë kontratën për ushqimet e fëmijëve kompanisë “PROINFINIT” shpk e cila nuk plotëson kriteret e kualifikimit, nuk ka eksperiencë dhe ka si pronare kryesore drejtoreshën dhe kontabilisten Desara Liko të kompanive të Shefqet Kastratit.
Nuk është hera e parë që ky institucion përfshihet në skandalin e tenderave që shkelin ligjin e prokurimeve. Megjithatë shpallja fitues edhe kur nuk plotësohen kushtet për kontratën me vlerë 330 mijë dollarë pa TVSH kur në skenë dalin njerëz që punojnë për Kastratin, kërkojnë miratimin e autoritetit më të lartë të bashkisë, kryetarit Erion Veliaj i cili u ka dhënë tendera pa fund dhe pa garë kompanive të Shefqet Kastratit.
Kompania “PROINFINIT” shpk me aksionere kryesore Desara Likon me 51% të aksioneve dhe Fluranza Citozi me 49% është themeluar në 2019 dhe në Qendrën Kombëtare të Biznesit (QKB) ka deklaruar bilancet vetëm për vitet 2019, 2020.
Te kushtet e dokumentave standarte (DST) të tenderit kërkohet që kompania të paraqesë bilancet vjetore për vitet 2018,2019 dhe 2020. Kompania nuk është në gjendje ta plotësojë këtë kusht sepse ajo është krijuar vonë në shtator 2019 dhe duke mos patur eksperiencë ka përfituar një kontratë publike e cila shkon përtej kapaciteteve të saj si kompani.
Fitimi i kompanisë për 2020 është 773,446 lekë ndërsa në 2019 ka dalë me humbje dhe nuk ka xhiro vjetore duke faktuar një tjetër shkelje të rëndë e cila është provë për skualifikim nga gara.
“Njohjen e rezultatit te vitit 2019 në humbje 153,514 LEK për shkak se gjatë vitit 2019 Shoqëria nuk kishte filluar ende aktivitetin e saj të shitjes “, deklarohet në QKB duke faktuar humbjet e kompanisë.
Gjithashtu te kapacitetet ekonomike dhe financiare kërkohen kopje te çertifikuara të bilanceve vjetore për vitet financiare 2018, 2019, 2020, ku bilancet e dy viteve të njëpasnjëshme, nuk duhet të kenë raport negativ ndërmjet aktivit dhe pasivit, shkelje tjetër që përforcon ekzistencën e procedurave antiligjore në prokurim.
Në 21 janar, fazën e kualifikimit e ka kaluar vetëm kompania “PROINFINIT” shpk ndërsa të gjitha kompanitë e tjera pjesëmarrëse janë skualifikuar por vetëm kompania “Nelsa” shpk ka bërë ankesë e cila është rrëzuar nga Komisioni i Prokurimeve Publike, pra kompania “PROINFINIT” shpk është shpallur automatikisht fituese.
Kompani “PROINFINIT” shpk gjatë këtyre dy viteve ka përfituar 3 kontrata publike me vlerë 4,8 milionë lekë, dy nga bashkia Divjakë dhe një nga bashkia Durrës, eksperiencë e cila nuk mund të merret parasysh kur te kushtet tenderit kërkohet që kompanie të ketë kryer një punë të ngjashme me vlerë 40 % nga fondi limit ose 15 milionë lekë.
Edhe pse nuk plotësojnë kushtet, kompanitë e Kastratit apo njerëz të punësuar te këto kompani dalin përfituesit e tenderave të bashkisë Tiranë por në këtë rast situata është më e rëndë sepse po flasim për ushqimin që u shpërndahet fëmijëve të vegjël nëpër kopshte dhe çerdhe e cili ndikon drejtpërdrejt te zhvillim fizik dhe mendor i tyre.
Discussion about this post