Studentët serbë godasin me vezë autobusin me mbështetësit e Vuçiç, përplasen me policinë

Autobusët e mbështetësve të Aleksandar Vuçiç janë goditur dje me vezë nga qytetarët. Një video e postuar në rrjetet sociale tregon qytetarët që përpiqen të bllokojnë autobusin që transportonte progresistët nga Obrenovci në Beograd për mitingun e Vuçiç, dhe më pas duke hedhur vezë në drejtim të tij, raporton KosovaPress.

Gjatë ditës, një grup studentësh nga Pazari, por edhe nga qytete të tjera serbe, bllokuan autobusët që po niseshin në tubimin e Vuçiç. Policia i ka larguar nga rruga, por sipas informacioneve të disponueshme nuk janë arrestuar.

Manifestimi qendror, me rastin e themelimit të Lëvizjes për Popullin nga pro-rusi Aleksandar Vuçiç, u zhvillua dje nga ora 19:00 para Kuvendit të Serbisë.

Serbia është përballur me protesta të mëdha studentore pas shembjes së tendës hekurudhore në Novi Sad, si pasojë e së cilës 16 persona kanë humbur jetën.

Kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e stacionit hekurudhor të Novi Sadit, për të përcaktuar përgjegjësinë për tragjedinë e 1 nëntorit, 2024.

Ata gjithashtu kërkojnë që sulmuesit e demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.

Në protestën e 15 marsit në Beograd është dëgjuar një zhurmë e madhe e për të cilën u tha se është shkaktuar nga një top akustik, i përdorur nga regjimi autoritar.

Komisionerja evropiane për zgjerim, Marta Kos, ka deklaruar se kërkesat që po i bëjnë protestuesit dhe studentët në Serbi janë plotësisht në përputhje me kërkesat që Komisioni Evropian i drejton Beogradit zyrtar.

Sipas saj, Serbia aktualisht është në stagnim në rrugën e saj drejt BE-së dhe ka përpara disa hapa të domosdoshëm nëse dëshiron të vazhdojë negociatat për anëtarësim.

Komisioni Evropian, siç theksoi ajo, kërkon reforma urgjente brenda tre deri në katër javësh – para së gjithash ndryshime në legjislacionin zgjedhor, reforma në ligjet për mediat dhe emërimin e një rregullatori të pavarur për mediat elektronike.