Trajneri i Anglisë, Thomas Tuchel, ka bërë një apel të veçantë përpara përballjes me Meksikën në raundin e 16-shes së Kupës së Botës, duke u kërkuar prindërve që t’i lejojnë fëmijët të ndjekin ndeshjen, edhe nëse kjo nënkupton mungesën në shkollë.
Duke qenë se sfida do të zhvillohet në orën 02:00 të mëngjesit, tekniku gjerman beson se ky është një rast i rrallë që meriton një përjashtim.
“Shkruani një arsye pse mungojnë në shkollë dhe lërini të shikojnë ndeshjen”, u shpreh Tuchel, duke shkaktuar reagime dhe buzëqeshje mes tifozëve anglezë.
Ai theksoi se Kupa e Botës është një ngjarje që zhvillohet vetëm një herë në katër vjet dhe se emocionet që ajo sjell janë të veçanta për çdo tifoz, sidomos për më të vegjlit.
“Ka shumë për të bërë në shkollë, por Kupa e Botës mbahet çdo katër vjet. Le t’i lëmë të shikojnë. Kemi një ndeshje shumë të rëndësishme dhe kemi nevojë për mbështetjen e të gjithëve, veçanërisht të fëmijëve”, deklaroi trajneri i “Tre Luanëve”.
Anglia do të përballet me Meksikën në një sfidë vendimtare për një vend në çerekfinalet e Botërorit, ndërsa deklarata e Tuchel ka tërhequr vëmendjen e mediave dhe tifozëve për mesazhin e saj të pazakontë.
Discussion about this post