Deputeti i Partisë Demokratike, Ervin Salianji komentoi në komisionin e Sigurisë Kombëtare kushtet jo të mira ku ndodhen Forcat e Armatosura dhe buxheti i pamjaftueshëm për to.
“Kur flasim për një objektiv që e kërkon NATO, këto para krijojnë parakushtet për modernizimin e forcave të armatosura. Ajo që ne e kishim shqetësim dhe u ngrit si pyetje, për t’ia hedhur vetes apo NATO-s. Sa ka qenë buxheti në raport me GDP në vitin 2020 dhe sa është i pritshmi në vitin 2022. Ka pirueta, duke futur në fondin e mbrojtjes edhe sigurimet shoqërore të ushtarakëve që janë liruar”, u shpreh Salianji.
Deputeti demokrat tha se në Zall Herr forcat e armatosura vijojnë të qëndrojnë në çadra, ndërkohë që qeveria ka harxhuar 5 milionë euro për të ndërtuar një muze që nuk është ende funksional.
“Nuk është aty ku duhet gjendja e helikopterëve, si është gjendja e operacionalitetit. Paratë e taksave të shqiptarëve paguhen pa pasur përgjegjësi. A do vijë helikopteri i blerë për një vit e gjysmë që ndodhet në Itali? A paguhet për parkimin e taksat atje? A i keni adresuar drejt fondet e buxhetit në raport me nevojat e forcave të armatosura? Në Zall Herr akoma rrinë nëpër çadra, ndërkohë që harxhohen 5 milionë euro për të bërë një muze që sot nuk është funksional”, tha ai.
Salianji tha ndër të tjera se disa prej godinave tokësore janë të dëmtuara nga tërmeti dhe kërkoi informacion se sa është shuma e fondeve parashikuar për rindërtimin.
Discussion about this post