Zjarr në kampin më të madh të refugjatëve në botë

Nuk ka paqe për Rohingya, pasi një zjarr i përmasave të mëdha shkatërroi një kamp refugjatësh, më i madhi në botë, ku qëndrojnë mijëra njerëz të grupit etnik mysliman në Bangladeshin jugor, duke lënë të paktën 12 mijë persona pa çati mbi kokë.

Fatmirësisht si pasojë e zjarrit, nuk raportohet për viktima. Incidenti shpërtheu në kampin Balukhali, në distriktin Cox’s Bazar gjatë së dielës, ku të paktën 2000 strehimore të improvizuara morën flakë dhe flakët u ndezën nga qindra bombola gazi të mbajtura në struktura të pasigurta, të ndërtuara me bambu dhe pëlhura gome.

Si pasojë e zjarrit u shkatërruan edhe objektet e kultit, qendrat arsimore dhe bizneset e vogla.

Një përfaqësues i Federatës Ndërkombëtare të Kryqit të Kuq dhe Gjysmëhënës së Kuqe shpjegoi për mediat se dëme janë raportuar edhe në infrastrukturën e ujit dhe shërbimet e tjera bazë.

Zjarri ndodhi në një kohë kur shkurtimet e ndihmave humanitare po ndërlikojnë më tej jetën e komunitetit që kanë ikur nga persekutimi në Mianmarin fqinj.

Flakët u përhapën për rreth tre orë në Kampin 11, i cili drejtohet nga IOM, Organizata Ndërkombëtare për Migracionin dhe që thuhet se është kampi më i madh i refugjatëve në botë.

Policia po heton për të zbuluar nëse bëhet fjalë për zjarrvënie të qëllimshme, teksa një person është arrestuar si i dyshuar.

Ky nuk është episodi i parë i kësaj natyre, pasi midis janarit 2021 dhe dhjetorit 2022, u konstatuan 222 zjarre në kampet Rohingya, dhjetëra prej të cilave ishin zjarrvënie të qëllimshme.

Ndër rastet më të rënda është ai i marsit 2021, me 15 të vdekur dhe 50 mijë të zhvendosur.

Rohingya janë një grup etnik i fesë islame që janë vendosur që nga shekulli i shtatë në Rakhine, një shtet birman që kufizohet në veri me Bangladeshin.

Ata konsiderohen ndër popujt më të përndjekur në histori. Mianmari i refuzon, duke i privuar nga të drejtat themelore si trajtimi në spitale, ndjekja e shkollave dhe posedimi i tokës.

Në vitin 2017, ushtria birmaneze kreu një masakër të vërtetë, duke detyruar rreth një milion Rohingya të iknin në Bangladesh. Shumë prej tyre kanë gjetur strehë në zonën e Cox’s Bazar, ku jetojnë ende në kushte të pasigurta.