Sonte mësohet finalisiti i parë, Arsenali kërkon të shkruajë historinë në tempullin anglez përballë Atletico Madrid

Pas barazimit 1-1 në ndeshjen e parë, Arsenali e di shumë mirë se një tjetër paraqitje e fortë në shtëpi ndaj Atlético Madridit mund t’i japë fund pritjes së gjatë për një finale në UEFA Champions League.

Ky është një sezon simbolik për londinezët, pasi bëhen plot 20 vite nga hera e fundit që arritën në finalen e kompeticionit më të rëndësishëm europian për klube. Forma aktuale jep arsye për optimizëm: “Topçinjtë” janë të pamposhtur në këtë edicion (10 fitore, 3 barazime), duke mbajtur edhe tetë herë portën e paprekur. Në fundjavë, skuadra e drejtuar nga Mikel Arteta dominoi 3-0 ndaj Fulhamin, duke konsoliduar vendin e parë në Premier League.

Në “Emirates”, Arsenali ka qenë pothuajse i pathyeshëm në Europë, me vetëm një humbje në 24 ndeshjet e fundit (17 fitore, 6 barazime). Këtë sezon ka fituar pesë nga gjashtë ndeshjet në shtëpi në Champions.

Nga ana tjetër, Diego Simeone dhe Atlético Madrid janë të detyruar të fitojnë për të kaluar më tej. Spanjollët vijnë nga një sukses 2-0 ndaj Valencias në LaLiga, duke siguruar praktikisht një vend në “top-4”. Tani fokusi është i gjithë te Champions-i, ku synojnë finalen e parë që nga sezoni 2015/16.

Statistikat janë në favor të tyre në gjysmëfinale europiane, me gjashtë fitore në shtatë të fundit, përfshirë eliminimin e Arsenalit në UEFA Europa League në vitin 2018. Megjithatë, forma jashtë fushe mbetet problematike: vetëm tri fitore në dhjetë transfertat e fundit dhe tri humbje në Champions këtë sezon, të gjitha ndaj skuadrave angleze.

Historiku gjithashtu favorizon anglezët. Atlético është mposhtur 4-0 në këtë stadium gjatë fazës së ligës dhe ka humbur gjashtë nga shtatë vizitat e fundit në Angli. Ndërkohë, Arsenali është i pamposhtur në nëntë përballjet e fundit ndaj ekipeve spanjolle (7 fitore, 2 barazime).

Sa u përket protagonistëve, Bukayo Saka rikthehet në formë të shkëlqyer, pasi shënoi dhe asistoi në fundjavë. Nga ana tjetër, Antoine Griezmann mbetet arma kryesore e Atlético-s, sidomos në pjesën e dytë të ndeshjeve. Mungesë e rëndësishme për spanjollët pritet të jetë Julián Alvarez.