Astana-Partizani, zbulohet axhenda e “demave”

Këtë të hënë, Partizani ka plotësuar edhe detajet e fundit, përsa I përket pragsfidës së vlefshme për turin play-off të Conference League.

Klubi i Partizanit ka vendosur që udhëtimi drejt Kazakistanit të bëhet të martën, praktikisht dy ditë para zhvillimit të ndeshjes në Astana, që është programuar për të enjten e 24 gushtit në orën 16:00.

Pas ndeshjes me Valmierën, drejtuesit e klubit kanë shqyrtuar të gjitha mundësitë, në mënyrë që të zgjidhej më e mira e mundshme, pasi bëhet fjalë për një udhëtim të gjatë, që në rastin më të mirë është rreth 7 orë në avion.

Për një avion çarter Tiranë-Astana nuk bëhej fjalë për disa arsye që nuk kanë lidhje me klubin, prandaj dhe janë gjetur linja tranzitore, ku pritet të udhëtohet fillimisht drejt Turqisë dhe më pas direkt në Astana.

Pritet që të martën pasdite skuadra të ketë mbërritur në Kazakistan, për t’u akomoduar menjëherë dhe përshtatur me klimën në qytetin e Astanës.

Kujtojmë që udhëtimi Tiranë-Stamboll shkon një orë e 40 minuta, ndërsa Stamboll-Astana 4 orë e 55 minuta.