Anthony Joshua ka folur për herë të parë pas fitores me nokaut ndaj boksierit shqiptar Kristian Prenga, duke pranuar se momenti kur u rrëzua në sekondat e para të duelit nuk ishte pjesë e planeve të tij.
Britaniku u përball me vështirësi që në fillim të meçit, pasi Prenga arriti ta rrëzonte dy herë.
Megjithatë, Joshua reagoi me qetësi dhe në raundin e dytë e mbylli sfidën me nokaut pas një serie goditjesh të fuqishme.
“Prenga ishte i fortë dhe erdhi për të më nokautuar. Kur më rrëzoi pas 20-30 sekondash mendova vetëm se duhej të ruaja qetësinë. Ishte një ndeshje me 12 raunde dhe duhej ta prisja momentin tim”, deklaroi Joshua për DAZN.
Ai zbuloi se strategjia e tij kishte qenë që në fillim të fitonte me nokaut, por pranoi se u befasua nga nisja e vrullshme e shqiptarit.
“E kisha planifikuar ta nokautoja, por në momentin e duhur. Për një çast mendova se kjo nuk ishte pjesë e skenarit, ndaj duhej të isha i duruar. Momenti im erdhi në raundin e dytë”, shtoi ish-kampioni i botës.
Joshua theksoi se nuk pati asnjëherë dyshime për rezultatin final, pavarësisht vështirësive në fillim të sfidës.
Pas kësaj fitoreje, vëmendja tashmë është te superdueli i shumëpritur ndaj Tyson Fury, një përballje që tifozët e boksit e kanë kërkuar prej vitesh.
Discussion about this post