Gara për titull në Premier League angleze bëhet më e ndezur se kurrë dhe meritën për këtë e ka Manchester City. Në Etihad Stadium skuadra e Pep Guardiolës iu imponua Topçinjve të Londrës duke i mposhtur me rezultatin 2-1 duke e reduktuar në 3 pikë diferencën me të besuarit e Artetës, ndërkohë që ka edhe një ndeshje më pak.
Vetëm 16 minuta lojë i mjaftuan skuadrës së Citizens për të marrë avantazhin në 1-0 teksa shënuan me Ryan Cherki. Por reagimi i Arsenalit ishte i menjëhershëm teksa vetëm 2 minuta më vonë arriti të barazojë rezultatin në 1-1 me Kai Havertz. Pikërisht me këto shifra skuadrat shkuan në pushimin e ndeshjes.
Në pjesën e dytë, Manchester City arriti të gjejë sërish rrugën e rrjetës këtë radhë me të zakonshmin Erling Haaland duke marrë kryesimin në 2-1. Londinezët u përpoqën të reagonin dhe arritën të godasin shtyllën, por në fund rezultati nuk ndryshoi më dhe Manchester City e fitoi këtë përballje 2-1 për të shkuar në 67 pikë, ndërsa Arsenali pësoi një tjetër humbje që e lë atë në kuotën e 70 pikëve. Dhe kjo do të thotë që javët e mbetura të Premier League angleze do të jenë akoma më të ethshme përsa i përket çështjes së titullit kampion.
Discussion about this post