Ish-ministri i Mbrojtjes Fatmir Mediu ka dorëzuar rekursin në Gjykatën e Lartë ku kundërshton vendimin e Gjykatës së Apelit të Posaçëm që i hapi rrugë rihetimit dhe gjykimit të Mediut për dosjen Gërdeci.
Rekursi është depozituar nga avokati i tij mbrojtës, Ardian Visha ku i kërkon Gjykatës së Lartë prishjen e vendimit të Apelit te Posaçëm, pasi e konsideron antikushtetues, dhe se për këtë çështje është dhënë njëherë vendim.
Në vendimin e arsyetuar, togat e zeza të Apelit theksonin se Fatmir Mediu nuk është gjykuar asnjëherë për çështjen e Gërdecit. Gjithashtu në vendim thuhet se afatet e parashkrimit janë respektuar, pasi Mediu është marrë i pandehur që në vitin 2009. Një tjetër argument që u përdor nga gjykata është edhe fakti që Mediut iu hoq imuniteti në vitin 2012, çka i hap rrugën gjykimit.
Kujtojmë se, çështja ndaj Mediut u mbyll më 14 shtator 2009, kur ai u rizgjodh deputet pasi avokatët mbrojtës në atë kohë argumentuan se hetimi ndaj tij bëhej vetëm pas autorizimit të Kuvendit për heqjen e imunitetit.
Por pas vendimit të Apelit të Posaçëm, për gjykim ndaj Mediut, dosja është në duart e strukturës anti-korrupsion, dhe i mbetet SPAK-ut, që të vendosë nëse do të kërkojë që ndaj Fatmir Mediut të caktohet masë sigurie apo procesi ndaj tij të zhvillohet në gjendje të lirë. Ishin familjarët e Edison Durdajt, 7-vjeçarit që humbi jetën si pasojë e shpërthimit që e vendosën në lëvizje SPAK për të rihapur dosjen Gërdeci.
Shpërthimi në Gërdec ndodhi më 15 mars, 2008 në një “fabrikë” për demontimin e armëve, ku nga shpërthimi humbën jetën 26 persona dhe u plagosën qindra të tjera. Për këtë tragjedi, prokuroria dërgoi 28 të pandehur në gjykatë, ndërkohë që Fatmir Mediu, në atë kohë ministër i Mbrojtjes i shpëtoi gjykimit pasi kishte mandatin e deputetit.
Dosja e “Gërdecit” është zvarritur prej disa vitesh, ndërsa në maj të këtij viti u vendos rihapja e çështjes, por deri më tanin kompetencat për të kanë kaluar sa në një institucion në tjetrin duke bërë të vështirë marrjen e një vendimi.
