Manchester City mori një fitore me zemër në dorë në ndeshjen e javës së 13 të premier League angleze. Skuadra e drejtuar nga Pep Guardiola mposhti në Etihad Stadium Leeds me rezultatin 3-2 dhe për momentin i afrohet në 4 pikë Arsenalit kryesues.
Ndeshja nisi në mënyrën më perfekte për Manchester City që e zhbllokoi rezultatin që në minutën e parë me Phil Foden. Në minutën e 25 Gvardiol shënoi një tjetër gol për Citizens duke e cuar rezultatin në 2-0 që mbeti i tillë deri në fundin e pjesës së parë.
Pas pushimit të ndeshjes, Leedsi arriti të shkurtojë diferencën në 2-1 me golin e Dominic Calvert-Lewin. Goli i dha krahë Leedsit që në minutën e 68 fitoi një 11 metërsh. Nmecha shkoi te pika e bardhë, por Donnarumma e ndali gjuajtjen e tij. Megjithatë topi shkoi sërish te Nmecha që e dërgoi atë në rrjetë duke barazuar 2-2. Ai që shpëtoi Manchester City ishte Phil Foden që në minutën e 91 shënoi golin e fitores 3-2 të Manchester City që shkon në 25 pikë, ndërsa Leeds mbetet në kuotën e 11 pikëve në zonën e ftohtë të rënies nga kategoria.
Me të njëjtin rezultat fitoi edhe Sunderlandi i Granit Xhakës ndaj Bournemouth me rezultatin 3-2 duke shkuar në 22 pikë. Le Fee, Traore dhe Brobbey ishin autorët e golave për Sunderland, ku Xhaka dhuroi edhe një asist, pikërisht në momentin e golit të barazimit 2-2. Gola që përmbysën avantazhin e dyfishtë të Bournemouth pas golave të Adli dhe Adams. Në ndeshjen tjetër të Premier League, Brentford mposhti Burnley 3-1.
Discussion about this post