Ish-fantazisti i Partizanit dhe Kombëtares, Dorian Bylykbashi në një intervistë enkas për “Panorama Sport” i ka bërë një analizë të hollësishme Partizanit dhe asaj që skuadra e Kolelës ka bërë deri më tani. Ai shprehet se “demat” ndodhen në pozicion komod në renditje, por duhet të përmirësojnë lojën ndaj ekipeve të vogla, sepse nuk duhet të bëjnë kaq shumë gabime nëse duan titullin kampion.
Përse nuk po e fiton dot Partizani derbin? Derbi nuk ka asnjëherë favoritë dhe nuk varet aspak nga renditja e skuadrave. Tifozëria e pret me entuziazëm të madh dhe plot me emocion dhe kjo mund të ndikojë edhe te disa lojtarë, që ngarkohen psikologjikisht dhe nuk arrijnë të japin më të mirën e tyre. Pastaj ka edhe gabime të vogla, të cilat në fund rëndojnë shumë. Për shembull Partizani pati raste me Skukën dhe të tjerët në derbi, të cilat duhet t’i kishte shfrytëzuar. Në derbi fitohet edhe me gjysmë goli, apo merr ndeshjen në dorë edhe me detaje të vogla. Po përmend një situatë, nëse e kalon herën e parë mbrojtësin, fiton besim, por nëse nuk e bën bllokohesh dhe të bëhet gjithçka malore.
A tregoi Partizani ndonjë defekt në ndeshjen me Tiranën? Nuk di të them. Tirana me të vërtet luajti me 10 vetë, por ndonjëherë në të tilla raste lojtarët marrin një forcë të madhe brenda tyre dhe japin 120% për të zëvendësuar atë që është përjashtuar. Kjo e ka ndihmuar Tiranën, sepse të gjithë lojtarët dhanë shpirtin në fushë. Nga ana tjetër kur je me një lojtar më pak se ekipi kundërshtar, në këtë rast Partizani, kalon me idenë se tashmë i futëm gjërat në vijë, jemi më lirshëm. Këto situata ndonjëherë të kthehen edhe në “bumerang”, sepse nga minuta në minutë ti pret që të shënosh dhe ndien më shumë presion.
Çfarë tregon fitorja ndaj Vllaznisë pas humbjes së dhimbshme në derbi? Kjo tregon se ekipi ka forcë brenda vetes. Por edhe me Vllazninë e nisën pak të ngurtë në fillim. Më pas u bë goli i Vllaznisë dhe reaguan. Treguan karakter të madh dhe treguan forcën e tyre. Padyshim që shpirti i garës është në karakterin e asaj skuadre, sepse nëse do të ishte ndryshe, nuk mund të ndodhte ajo përmbysje.
Si ju duket stili i lojës së të kuqve, ku duhet të përmirësohen? Për mendimin tim Partizani ka një ekip të kompletuar, megjithëse gjithmonë ka vend për përmirësim. Krijon shumë raste dhe kjo është gjë e mirë. Partizani për mendimin tim duhet t’i marrë ndeshjet një nga një, të vlerësojë çdo kundërshtar, sepse 10 ekipe janë dhe situatat janë të paparashikueshme. Kemi parë ekipe që humbasin këtë javë e mundin një ekip të fortë javën tjetër. Kukësi ishte në fund, tani është në vendin e katërt. Prandaj nuk duhen gabime dhe duhen vlerësuar në maksimum të gjitha ndeshjet. Këta trepikëshit e vegjël janë ata që të nxjerrin kampion në fund fare.
Discussion about this post