Pas pauzës së kombëtareve, rikthehet futbolli i klubeve, me skuadrën e Partizanit, që do të masë forcat në Superiore, përballë një prej rivalëve të saj.
Ekipi kryeqytetas ka kryer dje pasdite stërvitjen e radhës në kuadër të përgatitjeve për ndeshjen e së enjtes ndaj Vllaznisë në “Loro Boriçi”.
Në dispozicion të trajnerit Zoran Zekiç kanë qenë të gjithë lojtarët e gatshëm. Tekniku kroat dje është përqendruar më së shumti te taktika, pasi gjatë ditëve të fundit është kujdesur të analizojë me video kundërshtarin.
Duhet thënë se që nga porta do të ketë ndryshime, aty ku pritet të luajë Alban Hoxha, si rrjedhojë e aksidentit të rëndë automobilistik, pa pasoja fatale, që pësoi titullari Qirko.
Në mbrojtje pritet rikthimi i një mes Sotës dhe Koçijan, teksa në mesfushë Maget pritet sërish titullar krah Muratajt dhe Rrapajt. Taipi do të luajë pas dy sulmuesve, teksa në ofensivë Mba pritet ta nisë si titullar, së bashku Tedi Carës.
Takimi që do të nisë në orën 18:00, të ditës së enjte, do të jetë shumë domethënës për kampionët në fuqi të Shqipërisë, të cilët, përveç fitores, duan të bindin edhe me lojë, gjë që iu mungoi gjatë fushatës europiane, ku shkuan deri në play-off të Conference League, falë fatit që patën në short.
Discussion about this post