Lukas Podolski ka folur në kanalin e Bayernit për “përplasjen” e sotme të Champions League Gallatasaray-Bayern Munchen, e vlefshme për fazën e grupeve, java e 3-të.
Futbollisti 38-vjeçar ka pasur fatin të veshë të dyja fanellat, ndonëse në periudha të ndryshme të etapës profesionale.
“Pres që tifozët e Gallatasarajit të jenë zjarr. Ata e kanë dëshmuar se në çfarë trysnie mbytëse mund të vendosin rivalin, aq me tepër kur udhëtuesit nuk janë mësuar me skena të tilla.
Bayerni, nga ana e vet, ka ambicie të mëdha përpara, aty ku suksesi në çdo front nuk mund të justifikohet.
Harry Kane ka plotësuar mangësitë e sezonit të shkuar, “pykën” e mirëfilltë dhe profilin e liderit në fazën ofensive.
Bomberi anglez i ka dhënë provat edhe në Mynih se para portës është i pashpirt, nuk të fal. Ama edhe ekipi turk nuk mbetet mbrapa. Për mua ata kanë grupin më të mirë të 15 viteve të fundit, aq kohë sa unë i kam kushtuar disi rëndësi ligës turke.
Ecuria pozitive në të gjitha kompeticionet ka domethënie, kështu që do të jetë takim i dyluftuar. Nuk e mohoj se Bayerni më ka dhënë emrin dhe prestigjin që kam sot në futboll. Ta nisësh karrierën në një klub kaq të madh është me tepër sesa privilegj. Hënes, po ashtu, më ka ndihmuar, sikurse edhe familjen time. Ai gëzon kontribut të jashtëzakonshëm në rritjen e bavarezëve në shumë drejtime”, tha Lukas Podolski, i cili ende vazhdon të djersijë në fushën e blertë me skuadrën polake të Gornik Zabrze në moshën 38-vjeçare.
Discussion about this post