Federata Gjermane e Futbollit (DFB) ka nisur zyrtarisht bisedimet me Jurgen Klopp për postin e trajnerit të kombëtares, pas dorëheqjes së Julian Nagelsmann nga drejtimi i Kombëtares.
Nagelsmann u tërhoq pas një fushate zhgënjyese në Kupën e Botës, ku katër herë kampionët e botës u eliminuan në fazën e 1/16-ave pas humbjes me penallti ndaj Paraguait.
Ai kishte marrë drejtimin e ekipit në shtator të vitit 2023 dhe më herët kishte udhëhequr Gjermaninë edhe në Euro 2024, ku u eliminuan në çerekfinale nga Spanja.
Në deklaratën e tij të lamtumirës, Nagelsmann theksoi se vendimi nuk ishte i lehtë, por se kombëtarja kishte nevojë për një fillim të ri pas zhgënjimit në Botëror.
Ai falënderoi lojtarët, stafin dhe tifozët për mbështetjen, duke shprehur keqardhje për rezultatet e arritura.
DFB konfirmoi gjithashtu largimin e ndihmëstrajnerëve Benjamin Gluck dhe Benjamin Hubner, duke mbyllur kështu një cikël të plotë teknik në kombëtaren gjermane.
Presidenti i federatës, Bernd Neuendorf, vlerësoi punën e Nagelsmann, duke e cilësuar atë si një trajner të përkushtuar dhe ambicioz që kishte sjellë energji të re në ekip.
Ndërkohë, vëmendja tashmë është përqendruar te Jurgen Klopp, ish-trajneri i Liverpoolit, i cili prej kohësh ishte lidhur me stolin e Gjermanisë dhe aktualisht po shërben si analist gjatë Kupës së Botës.
Sipas DFB, Klopp ka shprehur gatishmëri të përgjithshme për të diskutuar marrjen e drejtimit të kombëtares.
Nëse marrëveshja finalizohet, Klopp pritet të nisë një epokë të re për Gjermaninë, me synimin për rikthimin e skuadrës mes pretendenteve kryesore në futbollin ndërkombëtar.
Discussion about this post