Finalja e Kupës së Botës 2026 pritet të jetë një nga ngjarjet më madhështore sportive dhe muzikore në histori.
Për herë të parë në një finale të Botërorit do të zhvillohet një spektakël zyrtar i pushimit mes pjesëve (“halftime show”), ku do të marrin pjesë disa nga emrat më të mëdhenj të muzikës botërore.
FIFA ka konfirmuar se Justin Bieber do të jetë pjesë e kësaj shfaqjeje, duke iu bashkuar yjeve si Madonna, Shakira dhe grupi i njohur korean BTS.
Spektakli do të zhvillohet më 19 korrik në stadiumin “New York New Jersey”, aty ku do të luhet edhe finalja e madhe e Kupës së Botës 2026. Organizatorët presin që kjo ngjarje të ndiqet nga qindra miliona tifozë në të gjithë botën.
Drejtimi artistik i shfaqjes do t’i besohet Chris Martin, liderit të grupit Coldplay, ndërsa qëllimi është krijimi i një kombinimi unik mes futbollit, muzikës dhe mesazheve sociale.
Në skenë do të performojnë gjithashtu Burna Boy, dirigjenti Gustavo Dudamel, kori PS22 Chorus dhe artistë të tjerë surprizë. Pjesë e spektaklit pritet të jenë edhe personazhe ikonike si Kermit dhe Miss Piggy.
Përtej argëtimit, eventi do të ketë edhe një mision humanitar përmes FIFA Global Citizen Education Fund, i cili synon të mbledhë 100 milionë dollarë për të mbështetur edukimin dhe mundësitë sportive për fëmijët në mbarë botën.
Justin Bieber e ka cilësuar pjesëmarrjen e tij si një nder të madh, duke theksuar se Kupa e Botës ka fuqinë të bashkojë njerëzit si pak ngjarje të tjera.
Discussion about this post