Teksa prej javësh, qytetarët e Tiranës protestojnë duke kërkuar dorëheqjen dhe arrestimin e Erion Veliajt për aferat e inceneratorit të Tiranës dhe asaj “5D”, kryebashkiaku vijon me ushtrimin e propagandës duke anashkaluar problemet dhe skandalet për të cilat kërkohet llogaridhënie.
Gjatë një aktiviteti këtë të Mërkurë, një ditë pas paraqitjes në SPAK për aferën e incenreatorit të Tiranës, Veliaj u shfaq larg qendrës së Tiranës, duke përsëritur premtimin “do ta mbyll mandatin me dy milion peme”.
“Kush të dojë të vijë ti numërojë. Po kush është burrë dhe kush është zonjë merr lopatën dhe mbjell dhe thotë unë e dhashë kontributin tim për Tiranën”, tha Veliaj.
Raportimet mediatike, ekspertë dhe raporte të institucioneve kanë faktuar se premtimi për mbjelljen e 2 milionë pemë është një gënjeshtër e kryebashkiakut të Tiranës, të cilën ai vijon ta përsërisë, pikërisht siç bëri një ditë më parë me paraqitjen “te kolegët prokurorë” me “iniciativë të tij”. Ndërkohë, në emër të “pyllit orbital” janë tenderuar miliarda në procedura të dyshimta korruptive.
Raportet e institucioneve ndërkombëtare dhe analizat në terren tregojnë se ndotja e ajrit në kryeqytet është në nivele shumë herë më të larta se norma e lejuar e Bashkimi Eurpoian, ndërsa qyteti po bëhet çdo ditë e më i pajtueshëm nën drejtimin e Veliajt. Sondazhet kanë treguar se banorët e Tiranës janë kundër ndërtimeve pa kriter, ndërsa cilësia e mjedisit, transporti publik i degraduar, mungesa e hapësirave të gjelbërta, janë probleme thelbësore që shqetësojnë.
Pavarësisht këtij realiteti që dëshmohet nga burimet e sipërcituara, Veliaj përsëriti këtë të mërkurë se ai dhe ekipi i tij kanë bërë “punë të mira” për Tiranën. Për të, këto probleme reale nuk ekzistojnë. Ndërkohë, pjesorët e ekipit të tij për të cilin flet, janë pas hekurave dhe nën hetim për aferën “5”, ndërsa Veliaj po refuzon llogaridhënien për skandalin. I akuzuar si “koka e drejtorëve hajdutë”, ai nuk po pranon të sqarojë pozicionin e tij përballë këshillit bashkiak apo duke iu përgjigjur mediave (siç ndodhi një ditë më parë, kur iku me shpejtësi nga gazetarët, pasi u premtoi se do t’u përgjigjej interesit të tyre).
Më tej gjatë fjalës së tij, Veliaj u dha këshilla qytetarëve të Tiranës të mos hedhin plehra nga ballkoni, si dhe falënderoi Policinë Bashkiake për “punën e mirë” që sipas tij, ka bërë. Falënderoi pikërisht atë polici bashkiake që zhdëpi në dru tregtarët ambulantë, një qasje që denoncohet se është bërë për qëllime korruptive dhe përfituesi është i pari i policëve të Veliajt.
Kryebashkiaku u mburr se Tirana ka “kriminalitetin më të ulët të qyteteve të Evropës” – edhe pse lufta ndaj krimit nuk është në tagrin e bashkisë. Megjithatë për lidhje të tija me krimin është folur jo pak, madje me organizata mafioze famëkeqe si Ndrangheta. Të tjera skandale po dalin nga dosja e përgjimeve të “SKY” në Belgjikë, që zbulon se bosët e krimit i kishin vënë syrin kullave të Tiranës.
Pika më emocionuese e fjalimit ishte kur Veliaj e paraqiti veten nën një aureolë pafajësie e heroizmi teksa kaloi në deklarata si: “Kur të ikim në botën e përtejme të shkojmë me dinjitet”.
Discussion about this post