Myrto Uzuni refuzon të stërvitet te Granada në Spanjë. Sulmuesi i Kombëtares kërkon rritje page dhe siç bën me dije Marca ai ka refuzuar të dalë në stërvitje, gjë që e konfirmoi edhe trajneri i ekipit.
Kjo situatë vjen në një kohë kur beratasi është i shumëkërkuar në merkato dhe një ofertë nga FC Austin në MLS (SHBA) duket se ka tunduar Uzunin.
Në moshën 29-vjeçare dhe me një paraqitje të jashtëzakonshme, Myrto Uzuni prej kohësh kërkon të përmirësojë kontratën e tij me Granadën, një marrëveshje që nuk është arritur, duke e shtrënguar litarin deri në një situatë të paqëndrueshme që tashmë ka shpërthyer në ajër.
Shqiptari ka në tavolinë një ofertë nga FC Austin e MLS-së. Skuadra amerikane do të ishte e gatshme të paguante rreth dhjetë milionë euro për të marrë shërbimet e sulmuesit beratas, paga e të cilit do të dyfishohej, duke i afruar pagë një milion e gjysmë euro, ofertë kjo që duket e pakundërshtueshme.
Përballë kësaj situate, Uzuni vendosi të ulet jashtë pas pushimeve dimërore dhe nuk pranoi të stërvitet, duke humbur ndeshjen ndaj Getafes, mungesë që do të përsëritet këtë të premte ndaj Burgos, siç konfirmoi trajneri Escribá në konferencën e mëparshme për shtyp.
“Kur u kthyem nga pushimet ai erdhi dhe tha se nuk e shihte veten në gjendje të stërvitej dhe nëse nuk stërvitet nuk ka rëndësi. Ai vazhdon me atë pozicion, që nuk dëshiron të stërvitet me skuadrën. Unë nuk mund të detyroj askënd të stërvitet dhe nëse nuk e bëjnë, nuk janë në llogaritë e mia”, tha Escribá.
Discussion about this post